مقارنه بين التسويق والتسويق الإلكتروني

مقارنة بين مزايا وعيوب التسويق الإلكتروني والتسويق التقليدي

بعد ما اتكلمنا عن مبادئ التسويق وعرفنا الفرق بين التسويق والتسويق الإلكتروني جه الوقت اللى نعرف فيه ليه نختار اعلانات النت ” التسويق الإلكتروني ” مش الاعلانات العادية.

- ليه تختار اعلانات النت ” التسويق الالكتروني

  • اولا : الفرق بين التسويق والتسويق الإلكتروني

علشان تعرف ليه تختار التسويق الإلكتروني  لازم تعرف الفرق بين التسويق الإلكتروني والتسويق العادي.

زي ما قولنا قبل كده إن الفرق بين التسويق والتسويق الإلكتروني بيكون في أدوات التسويق مش في مبادئ التسويق، بمعني  التسويق والتسويق الإلكتروني هما وجهين لعملة واحده، والعملة دي هي مبادئ التسويق، طيب امال ايه الفرق بين التسويق والتسويق الاكتروني؟

 

الفرق بين التسويق والتسويق والاكتروني في الأدوات اللى بتشتغل بيها مش في المبادي بمعني إن أنا لو عاوز أشتغل تسويق، عادي جدا هيكون عندي العلم بمبادئ التسويق وهشتغل بأدوات زي الإذاعة والتلفزيون، التليفون، اليفط الإعلانية، الملصقات الدعائية، والمنشورات دي بعض أمثلة أدوات التسويق العادي .

أما التسويق الإلكتروني فهتختلف عندي الأدوات اللى هشتغل بيها، والأدوات اللى هشتغل بيها التسويق الألكتروني زي السوشيال ميديا، تهيئة محركات البحث، “Google Display network” و ” Google adwords” و “Websites” تطبيقات الهواتف الذكية وطرق تانيه كتير .

 

  • ثانيا: مقارنة بين  التسويق الإلكتروني والتسويق التقليدي

لو عاوز تشتغل على التسويق الإلكتروني لازم تكون عارف هيفيدك في إيه، وعلشان نوصلك الفكرة صح هنعمل مقارنة سريعه بين التسويق التقليدي والتسويق الإلكتروني.

 

1- إستهداف العملاء

التسويق التقليدي : شبه مستحيل إنك تستهدف العميل اللى انت محتاجه لمنتجك أو لشركتك

التسويق الالكتروني: ممكن تستهدف العملاء اللى انت محتاجهم بسهولة تامة من حيث العمر أو المكان أو الجنس أو حتي الوظيفة.

 

2- التواصل مع العملاء

التسويق التقليدي : مش ممكن تتواصل مع العملاء لإن الإعلان بيتم بصورة غير مباشرة

التسويق الالكتروني: طبعا ممكن تتواصل مع العملاء بمنتهي السهولة لإن الإعلان بيتم بصورة مباشرة بينك وبين العميل

 

3- الرسالة الإعلانية

التسويق التقليدي : صعب تعدل الرسالة الإعلانية أو محتوي الإعلان لإن ده بياخد وقت كتير جدا

التسويق الالكتروني: تعديل الرسالة الإعلانية ببساطة لأن الإعلان في إيدك إنت والموضوع ما بياخدش وقت

 

4-  وقت الحملة الإعلانية

التسويق التقليدي : الإلتزام بمواعيد الحملة الإعلانية، ولازم يكون عندك مقر لشركتك وخدمة عملاء يتواصلوا مع العملاء اللي هيحبوا إنهم يعرفوا اكتر عن اعلانك

التسويق الالكتروني: إنت اللى بتحدد وقت الحملة الإعلانية، مش لازم يكون عندك مقر لإنك ممكن تبيع وتشتري من خلال النت.

 

5- الطلب على المنتج

التسويق التقليدي : الطلب على المنتج بيكون بشكل غير مباشر سواء من خلال خدمة العملاء او طريقة تانية

التسويق الالكتروني: الطلب على المنتج بيكون بطريقة مباشرة سواء اذا كان من خلال الطلب من على موقع الشركة أو من خلال صفحات السوشيال ميديا الخاصه بيها.

 

6- استمرارية العملاء

التسويق التقليدي : صعب تضمن إستمرارية العملاء لإن الإعلان بيكون فترة وبينتهي وبعدين العميل بينساك

التسويق الالكتروني: سهل تضمن إستمرارية العملاء بتوعك لإنك ممكن تخليهم يتابعوا صفحات السوشيال ميديا الخاصة بشركتك وبكده ممكن تتواصل معاهم في أي وقت وتضمن استمراريتهم.

 

7-  رأي العملاء “Feedback”

التسويق التقليدي : صعب تاخد رأي العميل في منتجك أو خدمتك لإن زي ما قولنا الإعلان بيكون بطريقة غير مباشرة

التسويق الالكتروني: سهل جدا تاخد رأي العميل في المنتج أو الخدمة أو حتي الشركة بمنتهي السهولة سواء بسؤال مباشر أو من خلال استفتاء أو طريقة تانية.

 

8- عدد العملاء

التسويق التقليدي: عدد العملاء بيكون قليل نسبيا، لانك بتخاطب عميل معين في سوق معين في دولة معينة

التسويق الالكتروني: عدد العملاء كبير جدا لإن التسويق الإلكتروني ممكن يفتحلك مجالات عمل في عدد كبير من الدول والأسواق المختلفة بعكس التسويق التقليدي.

 

9- عرض المنتجات والخدمات

التسويق التقليدي: صعب تعرض كل المنتجات والخدمات اللى بتقدمها الشركة لإن ده هيحتاج مكان كبير أو مجموعة كبيرة من الاعلانات

التسويق الالكتروني: سهل تعرض جميع المنتجات والخدمات من خلال الإعلانات، او من خلال عرضها على موقع الويب الخاص بالشركة.

 

10- التكلفة

التسويق التقليدي : طبعا التكلفة بتكون مرتفعه جدا لإنك بتستخدم وسائل إعلانية زي التلفزيون والجرايد

التسويق الالكتروني: إنت اللى بتقدر تحدد ميزانيتك الإعلانية، لإن تكلفة الإعلانات قليله جدا مقارنة بالتسويق التقليدي.

 

11- النتائج

التسويق التقليدي : صعب الحصول على النتائج لإن ده بياخد وقت طويل وكصب العملاء الجدد بيكون كمان بطريقة بطيئة

التسويق الالكتروني: النتائج بتوصلك أول بأول بكل التفاصيل اللى محتاج تعرفها عن الإعلان والتكلفة والتأثير

 

 

ثالثا: عيوب التسويق الإلكتروني

1- التكمولوجيا

وجود طبقة كبيرة من الناس اللى مش بتواكب التطور التكنولوجي ، وبالتالى ما بتستخدمش الإنترنت والوصول ليهم بيكونمحتاج التسويق التقليدي.

2- السياسات الأمنية

من أكثر المشاكل اللى بتواجه المسوقين والشركات على الإنترنت هي السيايسات الأمنية والوقائية اللى ما بتحفظش ليك حقوق الملكية الفكرية سواء في الإعلان أو المنتج.

3- حالات النصب

مشكلة كبيرة تانية بتواجه التسويق الإلكتروني وهي النصب والشركات الوهمية اللى بتستغل التكلفة القليلة لإعلانات النت وبتبدأ تروج لمنتجات وهمية .

 

بعد ما عرفنا الفرق بين اعلانات التسويق الإلكتروني والتسويق العادي، بقي الموضوع سهل عليك علشان تختار هتبدأ منين، ولازم تعرف إن التسويق الإلكتروني بقي جزء اساسي من استراتيجية أي شركة أو مؤسسة لإن التسويق الإلكتروني بيساعدك في غزو الأسواق الكبيرة وبيفتحلك مجالات وأسواق مختلفة على مستوي العالم، بالإضافة لإن تكلفته بسيطة، ونتمني ليكم التوفيق دائما 🙂

اورجانيرا بتوع النت

LEAVE A COMMENT